नवी दिल्ली : "वन रॅंक, वन पेन्शन‘च्या (ओआरओपी) मागणीसाठी माजी सैनिक आमरण उपोषण करत असून, उपोषण करणाऱ्या काही माजी सैनिकांची प्रकृती खालावल्याने त्यांना रुग्णालयात दाखल करण्यात आले आहे.
दिल्लीत "जंतर-मंतर‘वर माजी सैनिकांचे मागील अनेक दिवसांपासून उपोषण सुरू आहे. उपोषणाला बसलेले हवालदार (निवृत्त) अभिलाष सिंग यांची प्रकृती आज खालावल्यानंतर त्यांना लष्कराच्या रुग्णालयात दाखल करण्यात आले. मागील काही दिवसांपासून सिंग यांनी आमरण उपोषणाला सुरवात केली होती. सिंग यांच्यासह इतरही चार माजी सैनिकांना प्रकृती खालावल्यामुळे रुग्णालयात हलविण्यात आले आहे.
"ओआरओपी‘च्या मागणीसाठी माजी सैनिकांनी सुरू केलेल्या आंदोलनाचा आज 76वा दिवस आहे. माजी सैनिकांची मागणी पूर्ण करण्यासाठी आणखी काही दिवस लागतील, असे सरकारतर्फे काल सांगण्यात आले होते. सरकार आणि आंदोलन करणाऱ्या माजी सैनिकांच्या संघटनेतील चर्चा पुन्हा फिस्कटल्यामुळे हे आंदोलन चिघळण्याची शक्यता निर्माण झाली आहे.
[पीटीआय]