आतापर्यंत तुमच्याकडे टपाल आणणारे पोस्टमन यापुढे हे काम करणार नाहीत. तर टपाल घेऊन येण्याचे काम पोस्टपर्सन करणार आहेत. पोस्टमनचे नाव बदलून त्यांना 'पोस्टपर्सन' असा शब्द देण्यावर सध्या सरकार दरबारी विचार सुरू आहे.
माहिती तंत्रज्ञानविषयक संसदीय समितीने या नामांतराची शिफारस केली आहे. त्यावर हा बदल करण्याबाबत विचार सुरू असल्याचे टपाल खात्याने समितीला कळविले आहे. तसेच पोस्टमनसाठी हिंदीत असलेला शब्द 'डाकिया' हा लिंग-निरपेक्ष असल्याचेही खात्याने सांगितले आहे.
भाजपचे खासदार अनुराग ठाकुर हे या समितीचे अध्यक्ष आहेत. टपाल खात्याच्या अनुदान मागणीवरील आपल्या अहवालात समितीने टपाल पोचविणाऱ्या व्यक्तींसाठी वापरण्यात येणारी शब्दावली मागविली होती. त्यातच पोस्टमनला पर्याय म्हणून पोस्टपर्सन हा शब्द वापरण्याची शिफारस करण्यात आली.
मंगळवारी या समितीचा अहवाल संसदेपुढे ठेवण्यात आला. टपाल खात्यात पोस्टमन आणि पोस्टवुमेन हे दोघेही काम करतात. मात्र पोस्टमन हा शब्द केवळ पुल्लिंगवाचक आहे. त्यामुळे हा शब्द बदलण्यासाठी गरज असल्याचे समितीने म्हटले आहे. डाकिया हा शब्द लिंग-निरपेक्ष असल्याबाबतही समितीने संमती व्यक्त केली आहे.
कोणत्याही टिप्पण्या नाहीत:
टिप्पणी पोस्ट करा