अवंतीपूरा : काश्मीरच्या अनेक भागांत शनिवारी अधिकाऱ्यांनी नागरिकांच्या हालचालींवर बंधने घातली. सुरक्षा दलांच्या गोळीबारात दोन नागरिक ठार झाल्याच्या निषेधार्थ फुटीरवाद्यांनी बंदचे आवाहन केल्यानंतर प्रशासनाने खबरदारीचा उपाय म्हणून निर्बंध लादले. हे निर्बंध श्रीनगर, कुलगाम आणि पुलवामा जिल्ह्यांत आहेत.
जम्मू आणि काश्मीरचे पोलिस अधिकारी फेरोज अहमद दार (३२) यांचा शुक्रवारी रात्री त्यांच्या डोगरीपोरा (जि. पुलवामा) येथील पिढीजात कब्रस्तानात दफनविधी झाला. यावेळी अनेक ग्रामस्था आणि पोलिस खात्यातील सहकारी उपस्थित होते.
अचबल (जि. अनंतनाग) येथे लष्कर ए तयबाच्या संशयित दहशतवाद्यांनी पोलिस पथकावर शुक्रवारी केलेल्या हल्ल्यात दार व इतर पाच पोलिस ठार झाले होते. हल्लेखोरांनी या पोलिसांचे चेहरे विद्रूप करण्याचा प्रयत्न केला व त्यांच्याकडील शस्त्रेही ते घेऊन गेले. फेरोज दार यांच्या मागे वृद्ध आईवडील, पत्नी व सहा व दोन वर्षे वयाच्या दोन मुली आहेत. दार हे धाडसी अधिकारी असल्यामुळे मित्रमंडळीत ते दबंग नावाने परिचित होते.
काश्मीर खोऱ्यात शुक्रवारी तीन वेगवेगळ्या घटनांत १४ जण ठार झाले. मृतांत तीन दहशतवादी, दोन नागरिक, जवान आणि आठ पोलिसांचा समावेश आहे.
दक्षिण काश्मीरच्या अरवानी (जि. किलगाम) खेड्यात सुरक्षा दलांनी मलिक मोहल्ला भागातील एक घरात लष्कर ए तयबाच्या दहशतवाद्यांना घेरले. येथे झालेल्या जोरदार गोळीबारात जुनेद मट्टू याच्यासह तीन दहशतवादी मारले गेले. खोऱ्यात १२ मोस्ट वाँटेड दहशतवाद्यांत मट्टूचा समावेश होता. सुरक्षा दलांनी त्या घराला वेढा घालताच त्या भागात युवक जमले व त्यांनी सुरक्षादलांवर दगडफेक सुरू केली. त्यामुळे सुरक्षा दले आणि नागरिकांत चकमक सुरू झाली.या गोळीबारात मोहम्मद अश्रफ खार (२२) आणि अहसान दार (१४) हे नागरिक ठार झाले.
तीन दहशतवाद्यांचे मृतदेह आढळले
लष्कर ए तयबाचा कुख्यात दहशतवादी जुनेद अहमद मट्टू उर्फ जाना (२४), अदिल मुश्ताक मिर उर्फ नाना (१८) आणि निसार अहमद वानी (२०) यांचे मृतदेह दक्षिण काश्मीरमधील अरवानी खेड्यात चकमकीच्या ठिकाणी आढळले. गेल्या जूनमध्ये जुनेद याने भरदिवसा अनंतनाग बसस्थानकावर दोन पोलिसांना गोळ्या घालून ठार मारल्यानंतर लष्कर ए तयबात त्याला दक्षिण काश्मीरचा कमांडर बनवण्यात आले होते.
कोणत्याही टिप्पण्या नाहीत:
टिप्पणी पोस्ट करा